آپ کے بچے کیوں نہیں ہیں؟ اسما عباس نے ایسے سوال پوچھنے والی خواتین کو آڑے ہاتھ لیتے ہوئے کیا کچھ سنا دیا؟

پاکستانی ٹیلی ویژن کی سینیئر اداکارہ اسماء عباس نے 'بچہ نہ ہونے' کا سوال کرنے والی خواتین کی کلاس لے لی۔

اسما عباس سوشل میڈیا پر کافی متحرک ہیں اور وہ کسی بھی معاملے میں اپنی رائے دینے سے پیچھے نہیں رہتیں۔ پھر چاہے وہ سیاسی معاملہ ہو، شوبز کی بات ہو یا پھر گھریلو مسائل، وہ کھل کر اپنا موقف رکھتی ہیں۔

اسما عباس کی ایک ویڈیو کلپ سوشل میڈیا پر وائرل ہورہی ہے جس میں وہ خواتین کو غیر مناسب سوال کرنے پر ٹوکتی ہوئی نظر آئیں۔

اسماء عباس کا کہنا تھا کہ، یہ جو خواتین شادی کے کچھ وقت بعد جا کر لڑکیوں سے سوال کرنا شروع کر دیتی ہیں کہ کوئی خوشخبری ہے کیا؟ یہ بلکل غیر مناسب ہے۔ اس سے لڑکی ٹینشن میں آجاتی ہے جبکہ ساس کے دماغ میں بات آجاتی کہ ابھی تک کیوں نہیں ہوا۔

انہوں نے مزید کہا کہ، یہاں سلسلہ ختم نہیں ہوتا بلکہ جن کا ایک بچہ ہوتا ہے ان سے دوسرے بچے کا سوال کرتی ہیں۔ یہ بلکل بے کار باتیں ہیں، آپ کو کیا معلوم کہ وہ جوڑا کن حالات سے گزر رہا ہے؟ کوئی مسئلہ ہوسکتا ہے یا ان کو ابھی خواہش نہیں ہوگی۔ یہ ان کا ذاتی معاملہ ہئے۔

اسما عباس نے خواتین سے درخواست کی کہ خدارا وہ ایسے سوالات کرنے سے باز آجائیں اور دوسروں کی دل آزاری نہ کریں۔